Ground Breaking Sa Roro Port Sa Zamboanga del Norte

Si Zamboanga del Norte Governor Rolando Yebes. (Photo contributed by Nonoy Lacson)

KATIPUNAN, Zamboanga del Norte (Mindanao Examiner / Feb. 26, 2009) - Gihulagway nga usa ka makasaysayanon nga adlaw ang nahitabo sa lungsod sa Katipunan dungan sa ilang pagsaulog sa ika-95 ka adlaw nga kasumaran gikan sa pagkahimugso sa maong lungsod.

Gihimo ang ground breaking sa Roll-On Roll-Off port nga anaa sa New Tambo sa lungsod sa Katipunan. Sa hamubo nga programa, gipahayag ni Governor Rolando Yebes nga gikan karon pagatawgon na ang maong lungsod ug bag-ong Katipunan ug kini ang pagasugdan na karong panahona.

Gawas sa tabang sa probinsiya alang sa katumanan sa maong proyekto iyang gipanghinaot nga mo-ayuda usab niini ang Philippine Ports Authority. Gihatagan ug gibug-aton sa gobernador nga ang proyekto nga roll-on roll-off port sa Katipunan kini ang haom kaayo sa maong lungsod.

Hinungdan nga iyang gitambagan si Mayor Cris Eguia nga dili na kinahanglan pang hulaton ang PPA alang sa katukoran sa maong proyekto. Kinahanglan nga manghulam ug kuwarta ang lungsod ngadto sa bangko alang sa maong katuyuan gumikan kay ang provincial government ang anaa kanunay magpaluyo.

Ang nahisgutang proyekto kini usa lamang ka damgo kaniadto, apan pinaagi sa pagpaningkamot sa mga kadagkuan sa Katipunan ug sa probinsiya sa Zanorte ug Negros kini ang hinay-hinay karon nga natuman.

Gipahayag ni Governor Yebes nga ang roll-on roll-off port sa Katipunan ang gikinahanglan na pag-ayo karon ilabina nga aduna nay mando si Presidente Arroyo nga anhi mo-agi dinhi sa atong probinsiya ang train gikan sa Davao pinaagi sa Mindanao Railway System.

Bisan ang pantalan sa Dapitan dili na ma-akomodar ang ubang mga sakyanan nga nagdala ug daghanang mga produkto paingon ngadto sa probinsiya sa Negros pinaagi sa Roll-On Roll-Off tungod sa kadaghanan niini nga gikan pa sa General Santos City ug uban pang dapit dinhi sa Mindanao.

Kini timaan lamang sa nakitang kahigayunan nga magmalamboon ang atong probinsiya basta anaa lang ang panaghi-usa ug pagtinabangay. Matod pa ni Governor Yebes nga ang RoRo Port sa Katipunan maoy usa sa mga lugar nga makatabang sa probinsiya nga maoy mag-una diha na sa pagpalambo sa ekonomiya.

Kini maoy usa ka sakyanan nga magdala ug kaayohan ngadto sa probinsiya sa Negros ug balik dinhi sa atong lalawigan. Samtang gipahayag ni Congressman George Arnaiz sa probinsiya sa Negros nga miduyog sa maong ground breaking nga dugay ra kaayo ang maong tinguhang pagtukod ug RoRo Port sa maong lungsod.

Hinungdan nga mismo sila ang apil gayud sa naningkamot nga matuman ang maong proyekto, tungod kay ilang nakita nga apil ang probinsiya sa Negros sa kalambuan nga mahatag sa maong Puerto. Iyang gipasalig nga kutob sa iyang mahimo iya gayud nga paningkamutan nga matabangan ang lungsod sa Katipunan alang sa kahumanan sa maong proyekto.

Samtang gipasabot usab ni Congressman Henry Teves kung unsa ka importanti ang maong proyekto sa Katipunan. Ang Mindanao ang abundo kini sa mga nagkadaiyang produkto nga gikinahanglan sa Visayas ug Luzon. Gani ang factory nga gipanag-iyahan sa ilang pamilya anhi pa sila dinhi sa Mindanao mangumpra ug cassava.

Bisan sa kabahin sa mga torista nakita nga sayon ug dali ra unya ang pagtabok-tabok niini gikan sa Negros paingon dinhi sa Zamboanga del Norte sama sa mga produkto nga dali ra ang pagtumod niini ngadto sa mga merkado sa Visayas gamit ang RoRo Port sa Katipunan.

Gidugang ni Congressman Teves nga atol sa budget hearing sa kongreso sila ni Congressman Arnaiz gi-ayo nila ug sukit-sukit ang kabahin sa pundo sa PPA alang sa RoRo Port sa Siaton ug sa lungsod sa Katipunan sa kantidad nga 60 milyones pesos.

Alang kaniya nga kung anaa ang panaghi-usa sa mga opisyales siguradong maangkon ang kalambuan. Daw sa na e-motional si Congressman Teves sa iyang gipaambit nga mensahe kung unsa ka importanti ang pagserbisyo ngadto sa katawhan mintras anaa pa kita sa kalibutan.

Alang kaniya kariyot ra kaayo ang kinabuhi ug niining atong kinabuhi walay sapayan kung unsa ang atong makuha. Ang pinaka-importanti mao ang mga maayong nabuhat nga ikabilin sa mga katawhan sa dili pa kini mopanaw.

Mahinumduman si Congressman Teves ang biktima kini kaniadto sa nahitabong pagbuto sa bomba sa kongreso nga gikamatay sa iyang staff nga si Maan Bustalino nga taga dinhi sa dakbayan sa Dipolog.

Si Congressman Teves ang nakalingkawas kini sa maong hitabo nga nakaangkon ug pagkadaot sa iyang duha ka mga kamot nga pabilin niya karong gihambin. Pareho usab nga mipabati sa ilang dakong pagpasalamat sila si Mayor Cris Eguia, Vice Mayor Patchi Eguia ug Mayor Vincent Emil Arbolado sa pagpaningkamot ug suporta nga gilugway sa mga nahisgutang opisyal sa Negros ug Zamboanga del Norte alang sa maong proyekto sa Katipunan.

Ang RoRo Port sa Katipunan maoy magdugtong sa probinsiya sa Negros nga diin anaa lamang sa duha ka oras ang biyahe paingon ngadto sa Visayas gikan sa lungsod sa Katipunan.

"CONG LABADLABAD BUGNAW ANG SUPORTA SA RORO PORT"

Daw sa nakita nga walay interest nga motabang karon si 2nd District Cong. Dodoy Labadlabad sa katumanan karon sa RoRo Port sa lungsod sa Katipunan nga gihimo ang ground breaking niini kagahapong adlawa.

Sila si Cong. Teves ug Cong. Arnaiz ang parehong mipabati sa ilang panawagan nga gikinahanglan ang panaghi-usa sa mga opisyales niini dinhi sa Zamboanga del Norte alang sa kaayohan sa katawhan.

Ang maong proyekto ang dugay na kining gipangandoy ug karon hinay-hinay na kining gisugdan.
Sa interview, gipahayag ni Cong. Teves nga kaniadto sa dihang anaa pa siya sa Provincial Board ug gobernador pa si Cong. Arnaiz dugay na na kaayo nilang gitinguha ang maong proyekto nga magdugtong ang Katipunan ug probinsiya sa Negros.

Alang sa kongresista nga ang USA nga pagpaningkamot maoy mas maayo nga buhaton. Sila sa Negros nga human nagkahi-usa sila tanang mga opisyales atubangan sa managlahi nga partido misugod paglambo ang ilang lalawigan.

Giklaro ni Cong. Teves nga ang gusto unta nila nga mahitabo nga naa si Cong. Labadlabad sa panahon nga mo-follow-up sila alang sa maong proyekto ngadto sa DOTC ug ngadto kang Presidente Arroyo tungod kay ang Katipunan nahisulod sa distrito ni Cong. Labadlabad. ( Nonoy E. Lacson )